Voa a boor Wochan, lang is ned her, hock i gmiadlich mit na Hoibn aufd Nocht do und hea auf oimoi so an laudn Sound wia wenn a Alarm vo am Auto losmacht. Grissn hods mi! Aber mei, werd scho ned mei Karrn sei und wenn doch: der Kibe is eh nix mehr wert. Konzentrier i mi wieda auf mein Feieromd. Doch mit dem fangts erst o.
Dauerts ned lang, kimmt des Geräusch nomoi. I deng ma: “Sog amoi, bringts de Kischtn ned auf? Amateure!” Vom Balkon aus war nix auffälligs zum seng. Nja, konnst eh nix macha. Zeit zum obflacka.
De Nocht drauf dessoibe Spui. Oiso entweda derfa boid de ganzn Nachbarn im Viertl z’Fuaß ind Arbad geh oder es is doch ganz wos anders. Vielleicht a Koda oder a andas Viech wos im Motorraum neig’hockt hod und do aweng rumspuid. Möglich war a, dass bei dem Gerät elektrisch wos im argen is. Wern ja oiwei komplizierda de Sachan! Oa gloane Spannungsspitze oder an Funkendratza und da Bordcomputa draht durch.
Noch a boor Dog war dann doch a Rua. Irgendwer hod de Sache scho reparierd oda de Stod derf hergeh und de Öffentlichn weida ausbaun. Mia sois recht sei solang as Radler schee kühl is.