und pumpt sovui sie pumpn ko. Wochenlanga Einsatz vom THW an der Berufschui in Dacha. Okay, nur as Matrial, koane Leid. Des lafft ja heid ois automatisch. Frogt ma si hoid, wos do bassierd is.
Kuaz vazoid: Wasserrohrbruch im Kella von da Schui. I hobs desweng gspannt, dass wos bassierd is, weil auf oamoi in da Nocht da Strom weg war. Oiso bei mir in der Wohnung. Und im ganzn Haus. Und im ganzn Block. Mei, hiflackt und a Rua. Werd scho wern, sogt Frau Bern.
In da Zeidung homs dann gschriem, dass do ehm a Rohr zamdraahd hod und weil do a Trafo is, hods den glei ausgschoitn. Da Hausmoasta hods glei gspannd und so is as Elektrische in da Fria zum Glück glei wieda ganga.
Aber obpumpmt muaß no wern! Seit Wochen städ der Kontainer do und lafft und lafft vor so hi. Moi schaun obs no schreim wiavui Kubik do nauskemma san. Koa Wunder, dass bei uns as Grundwasser so diaf gsunga is! Koana denk an de Aant heia und dass da Mais woi nix gscheids werd. Miaß ma doch olle wieda Radl fahrn. Zum Voikfest zum Beispui, heid letzte Dog.
I schlog vor fürs nächste Joor auf da Thoma-Wiesn Die Taktlosen mit ihrer Pumpm spuin zum lassen. Feicht, fröhliche Stimmung garantiad!