Da Frühling is do und ma hod den Drang mehra Zeid draußn zum verbringa. Und wenn ma nur an Grill aufm Balkon oschmeißt. Sonna tankn, guad geh lassn und fürs nächste Schlechtweda präpariern.
Oda ma gäd a Rundn durch de Siedlung. Es gibt immer wos Neis zum seng wenn ma nur an Weg oiwei anders legt. Routine macht drogad. Friisch und abwechslungsreich bleim! Sunst dad ma zum Beispui ned mitgriang, dass do nei baud werd oda woanders den Spuiblootz wegam Corona zua gmacht hom. Guad, ned soo aufregend. Aber für an Flurfunk glangts.
Anders bei am gloana Karton am Straßenrand, der do einsam und verlassn städ. Hod do jemand bei seim Umzug wos überseng? Oda hod a Schlawiner sein Müll do obgloon. Schau ma uns de Sache genaua o!
An Haufa Biacha san drin. A Biachakistn, woi zum Tauschn in der Nachbarschaft. Scheene Idee. So koon as wuide Apruiweda kema (und da Virus si schleicha)!